በአማራ ክልል ፖሊስ ዋና ጠቅላይ መምሪያ ለረጅም ዓመታት በታማኝነት ላገለገሉ ከፍተኛ አመራሮችና አባላት ዕውቅናና ሽልማት ተበረከተላቸው
የአማራ ክልል ፖሊስ ዋና ጠቅላይ መምሪያ በተቋሙ ውስጥ ለረጅም ዓመታት በታማኝነት፣ በፅናትና በትጋት ሲያገለግሉ ለቆዩ ከፍተኛ አመራሮችና የሰራዊቱ አባላት የዕውቅናና የሽልማት ፕሮግራም አካሄደ።
በተካሄደው የሽልማት መርሃ-ግብር ለ25 ዓመታት ያህል ተቋሙንና ህዝብን በታማኝነት ያገለገሉ ስትራቴጅክና ከፍተኛ የፖሊስ አመራሮች የወርቅ ሜዳይ ተበርክቶላቸዋል።
በተጨማሪም አገልግሎታቸውን አጠናቀው በክብር በጡረታ ለተሸኙ የፖሊስ አመራሮችና አባላት የምስክር ወረቀትና የዕውቅና ሽልማት በመስጠት በደመቀ ሁኔታ ሽኝት ተደርጎላቸዋል።
በስነ-ሥርዓቱ ላይ ተገኝተው ንግግር ያደረጉት የአማራ ክልል ፖሊስ ዋና ጠቅላይ መምሪያ አዛዥ ኮሚሽነር ጀኔራል ዘላለም መንግሥቴ (ዶ/ር) እንደገለጹት የፖሊስ ሰራዊት አባላትና አመራሮች ህግና ስርዓትን በማስከበር፣ የህዝብን ሰላምና ደህንነት በመጠበቅ ረገድ የሚያደርጉት ተጋድሎ ከፍተኛ ዋጋ የሚሰጠው ነው ብለዋል።
ኮሚሽነር ጀኔራሉ አክለውም ዛሬ ዕውቅናና ሽልማት የሰጠናቸው አመራሮችና አባላት ለሩብ ክፍለ ዘመን ያህል በታማኝነት ያበረከቱት አስተዋጽዖ ለወደፊቱ ትውልድ ትልቅ አርአያነት ያለው ነው፤ በጡረታ የተሸኙ አመራሮችም ላበረከቱት ታላቅ ሀገራዊ አገልግሎት ተቋሙ ከፍተኛ ምስጋና ያቀርባል ሲሉ ተናግረዋል።
በዕለቱ የወርቅ ሜዳይ ከተሸለሙት ከፍተኛ አመራሮች መካከል አስተያየታቸውን የሰጡት እንደተናገሩት የተሰጣቸው ዕውቅናና የሜዳይ ሽልማት ለሰራነው ስራ ትልቅ ክብር የሚሰጥ መሆኑን ገልፀዋል።
ይህ ሽልማት ላለፉት 25 ዓመታት ህዝብና ሀገርን ለማገልገል የከፈልነውን መስዋዕትነት የሚያስጠራና በቀጣይም ለመልካም ስራ የሚያበራታታ ነው ሲሉ በዕለቱ የወርቅ ሜዳይ የተሸለሙ አመራሮች ገልጸዋል።
አገልግሎታቸውን አጠናቀው በጡረታ የተሸኙት የሰራዊቱ አመራሮች በበኩላቸው በተደረገላቸው አሸኛኘትና የዕውቅና ሽልማት ደስተኛ መሆናቸውን ገልጸዋል።
በፖሊስ ተቋም ውስጥ አገልግለን በክብር በመሸኘታችን ኩራት ይሰማናል ከተቋሙ ብንለያይም ለህዝብና ሀገር ሰላም በየአካባቢያችን የሚኖረንን ማህበራዊና ዜግነታዊ ኃላፊነት ከመወጣት ወደኋላ አንልም ሲሉ ተናግረዋል።
በመርሃ-ግብሩ ማጠቃለያ ላይ ለተሸላሚዎችና በጡረታ ለተሸኙ አመራሮች እና አባላት የዕውቅና ሽልማት እና የምስክር ወረቀት ተበርክቶላቸው ፕሮግራሙ በታላቅ ስነ-ሥርዓት ተጠናቋል።
