በሰላም እና ጸጥታ ጉዳዮች ላይ የሚያተኩረው የጣና ፎረም ጉባኤ በሰላም እንዲካሄድ አስፈላጊው ቅድመ ዝግጅት መደረጉ ተገለፀ።
የአፍሪካ መሪዎች፣ ከፍተኛ ዲፕሎማቶች እና ምሁራን የሚሳተፉበት ይህን ስብሰባ ሰላማዊ እና ደኅንነቱን ሙሉ በሙሉ አስተማማኝ ለማድረግ የሚያስችሉ ሰፊ የቅድመ ዝግጅት ስራዎችን ማጠናቀቁን ፖሊስ አስታውቋል።
የአማራ ክልል ፖሊስ ዋና ጠቅላይ መምሪያ ምክትል ኮሚሽነር ጀኔራል እና የኦፕሬሽናል ጠቅላይ መምሪያ አዛዥ ረዳት ኮሚሽነር ዘለቀ አለባቸው መግለጫ ሰጥተዋል።
ከጥቅምት 13 ቀን 2019 ዓ.ም ጀምሮ በባህር ዳር ከተማ የሚካሄደው በሰላም እና ጸጥታ ጉዳዮች ላይ የሚያተኩረው 12ኛው የጣና ፎረም ዓለም አቀፍ ስብሰባ በሰላም እንዲካሄድ የቅድመ ዝግጅት ስራ መከናወኑን ምክትል ኮሚሽነር ጀኔራሉ በመግለጫው አንስተዋል።
የጣና ፎረምን ጉባኤ ሰላም ከፍ አድርጎ ለማስጠበቅ የሀገር መከላከያ ሰራዊት፣ የፌዴራል ፖሊስ፣ የክልሉ ፈጥኖ ደራሽ ፖሊስ፣ የአድማ መከላከል እንዲሁም የተቋማት ጥበቃ ፖሊሶች ከክልሉ የጸጥታ ኃይሎች ጋር በመሆን በከፍተኛ የሰራዊት ትስስር እና ቅንጅታዊ አሰራር እየተንቀሳቀሱ ይገኛሉ ሲሉ ረዳት ኮሚሽነር ዘለቀ ገልጸዋል።
እነዚህ የጸጥታ አካላት በከተማ ውስጥም ሆነ በዙሪያዋ ባሉ መግቢያ እና መውጫ አካባቢዎች ጥብቅ የቁጥጥር እና የጥበቃ ስራዎችን በመዘርጋት የህዝብን እና የእንግዶችን ደኅንነት በአስተማማኝ ሁኔታ እያስጠበቁ ነው ሲሉ አክለዋል።
የቅድመ ዝግጅት ስራው የከተማዋን አንጸባራቂ ገፅታ ከመጠበቅ ባለፈ ስብሰባው ከጅምሩ እስከ ፍጻሜው በሰላምና በታቀደው ልክ እንዲጠናቀቅ የሚያደርግ አስተማማኝ የጸጥታ ሁኔታ ተፈጥሯል ነው ያሉት ምክትል ኮሚሽነር ጀኔራሉ በሰጡት መግለጫ።
በዋና ዋና መንገዶች ላይ የትራፊክ ፍሰትን የሚያቀላጥፉ እና የጸጥታ ስራን የሚያጠናክሩ ዝግጅቶች ተደርገዋል ሲሉ አክለዋል።
እንደ የኦፕሬሽናል ጠቅላይ መምሪያ አዛዡ በተለይ እንግዶች በሚያርፉባቸው ሆቴሎች እና ስብሰባው በሚካሄድበት አዳራሽ ዙሪያ የተጠናከረ የክትትልና ቁጥጥር ስራዎች ይከናወናሉ ብለዋል።
ውይይቱ በሰላም እንዲጠናቀቅ በየደረጃው የምትገኙ የጸጥታ አካላት ማህበረሰቡን አጋር በማድረግ የተጣለባችሁን ህዝባዊ ኃላፊነት በአግባቡ ልትወጡ ይገባል ሲሉ ረዳት ኮሚሽነር ዘለቀ አሳስበዋል።
የጸጥታ ኃይሉ ከከተማው ማህበረሰብ እና ወጣቶች ጋር ተቀናጅቶ ቋሚና ተንቀሳቃሽ ጥበቃው ለ24 ሰዓት ይከናወናል ነው ያሉት።
የከተማው ማህበረሰብ፣ ወጣቶች እና ልዩ ልዩ አደረጃጀቶች ከጸጥታ ኃይሉ ጋር ተቀናጅተው ሰላም እና ደኅንነትን ለማስከበር በሚያስችል ቁመና ላይ እንደሚገኙም አስረድተዋል።
እንግዶች በሚንቀሳቀሱበት ማንኛውም ቦታ ህብረተሰቡ ቅድሚያ በመስጠት እና በማክበር የኢትዮጵያዊነት መገለጫ የሆነውን እንግዳ ተቀባይነትን በተግባር ልናረጋግጥላቸው ይገባል ሲሉ ምክትል ኮሚሽነር ጀኔራሉ አጽንኦት ሰጥተዋል።
በሐይቁ ላይ የሚደረጉ ጉዞዎች እና የጀልባ እንቅስቃሴዎች ፍጹም ደኅንነታቸው የተጠበቀ እንዲሆን ከሚመለከታቸው አካላት ጋር በመቀናጀት ጥብቅ የደኅንነት እና የቁጥጥር ማዕቀፍ ተዘርግቷል ብለዋል።
ሰላም የሁሉ ነገር መሰረት በመሆኑ ህብረተሰቡ ከዚህ ቀደም እንዳደረገው ሁሉ አሁንም ለጸጥታ ኃይሉ አጋዥ በመሆን የድርሻውን እንዲወጣ ምክትል ኮሚሽነር ጀኔራል እና የኦፕሬሽናል ጠቅላይ መምሪያ አዛዥ ረዳት ኮሚሽነር ዘለቀ አለባቸው ጥሪ አቅርበዋል።
